AI në marketing na ka futur në dilemën mes “zëvendësimit” e “fuqizimit”!
E dëgjoj shpesh këtë pyetje tek kolegët: “A do të na zëvendësojë AI?” E kuptoj plotësisht këtë shqetësim, pasi ritmi me të cilin po zhvillohet teknologjia është shumë i shpejtë dhe shpesh i vështirë për t’u ndjekur. Por, nga përvoja dhe këndvështrimi im, AI nuk po na largon nga loja, por po ndryshon rregullat e saj.
Po, AI është më e shpejtë se ne në disa detyra teknike dhe mund të përpunojë sasi të mëdha të dhënash më mirë se çdo njeri. Por marketingu nuk është vetëm algoritme dhe analiza. Marketingu është krijimtari, tregim historie dhe emocion. Është aftësia për të bërë njerëzit të ndihen të kuptuar dhe të lidhur me një markë diçka që teknologjia ende nuk e imiton dot plotësisht.
Pse nuk besoj se marketingu po “vdes”?
- Kreativiteti njerëzor është i pazëvendësueshëm. Një ide e re, një histori që prek emocionet ose një mesazh që frymëzon nuk mund të dalë nga një algoritëm.
- Shembulli i shahut. Kur AI mposhti kampionët botërorë në shah, loja nuk u zhduk, por u bë më popullore se kurrë. Njerëzit e duan garën dhe historinë pas saj. E njëjta gjë do të ndodhë me marketingun.
- AI + njeriu = superfuqi. Fituesit e së ardhmes do të jenë ata që kombinojnë shpejtësinë dhe saktësinë e AI me kreativitetin dhe ndjeshmërinë njerëzore.
Si po e transformon AI marketingun?
Unë nuk e shoh AI si kërcënim, por si partner. Ja pesë fusha ku ndikimi i saj është i dukshëm:
1. Kërkimi në AI (AI Search)
Nuk mjafton të optimizosh vetëm për Google. Duhet të që marka jote të shfaqet edhe në përgjigjet e ChatGPT, Claude, Gemini dhe platformave të tjera të ngjashme. Kjo kërkon strategji të re dhe optimizim për pyetje të ndryshme.
2. Përmbajtje e shkurtër (video) me ndikim
AI më ndihmon të krijoj shpejt video të shkurtra dhe tekste që kapin vëmendjen në sekondat e para. Në rrjete sociale, ky “hook” është çelësi i suksesit.
3. Kodimi
Nga një PDF statike, tani mund të krijojë mini-aplikacione që i japin përdoruesit vlerë të menjëhershme.
4. Motorët e kërkimit
Me AI mund të analizoj “sinjale” për të kuptuar kur një klient potencial është gati të blejë, dhe ta personalizoj komunikimin sipas këtij momenti.
5. Fushatat për mikro-audienca
Në vend të një mesazhi për një segment të madh, AI lejon krijimin e dhjetëra fushatave të personalizuara për grupe shumë të vogla të targetuara, duke rritur ndjeshëm rezultatet.
E ardhmja ofron një mundësi
Për mua, AI nuk është fundi i marketingut. Është fundi i “mënyrës së vjetër” të të bërit marketing.
Po bie kostoja e krijimit të përmbajtjes dhe po shkurtohet koha e ekzekutimit. Kjo na jep mundësinë të bëjmë më shumë, të testojmë më shpejt dhe të arrijmë rezultate më të mëdha me të njëjtin buxhet.
Prandaj, nuk pyes veten “A do të më zëvendësojë AI?”. Pyetja ime është:
“Si mund ta përdor AI për të krijuar marketing më kreativ, më personal dhe më efektiv?”
Sepse e ardhmja do t’u përkasë atyre që e shohin AI si partner për të shkëlqyer, jo si kërcënim nga i cili duhet të fshihen.
